కూరెళ్ల విఠలాచార్య గారిని సత్కరించుకోవడం మన అదృష్టం: జాతీయ బీసీ దళ్ అధ్యక్షులు దుండ్ర కుమారస్వామి
హైదరాబాద్ లోని సరస్వతి పరిషత్ లో బ్రహ్మశ్రీ కూరెళ్ల విఠలాచార్య గారికి సన్మాన కార్యక్రమం అంగరంగ వైభవంగా సాగింది. ముఖ్యంగా సాంస్కృతిక కార్యక్రమాలు బాగా అలరించాయి. అద్భుతమైన పాటలతో అలరించారు. తెలుగు రాష్ట్రాలలోని ఎంతో మంది కళాకారులు తమ ట్యాలెంట్ తో ఆకట్టుకున్నారు. సంగీత పరికరాలు లేకుండా సంగీతం, అద్భుతమైన గీతాలాపనతో చేసిన ప్రదర్శన అద్భుతమనే చెప్పాలి. కళాకారులు ప్రేక్షకులను విశేషంగా ఆకట్టుకున్నారు. తమ సంగీతంతో మంత్రముగ్ధులను చేశారు. ఈ కార్యక్రమంలో దరాబస్తు లింబాద్రి, నందాల మురళి, దాప్సే శివకుమార్, కపిల రాంబాబు, శ్రీమతి శోభ తదితరులు పాల్గొన్నారు.
జాతీయ బీసీ దళ్ అధ్యక్షులు దుండ్ర కుమారస్వామి మాట్లాడుతూ ప్రముఖ సాహితీవేత్త, దాశరథి పురస్కార గ్రహీత డాక్టర్ కూరెళ్ల విఠలాచార్యను సన్మానించడం గొప్ప అదృష్టంగా భావిస్తున్నామని అన్నారు. యాదాద్రి భువనగిరి జిల్లా రామన్నపేట మండలం వెల్లంకి గ్రామానికి చెందిన కూరెళ్ల విఠలాచార్య గారు తన ఇంటిని గ్రంథాలయంగా మార్చడం నిజంగా గొప్ప విషయమని అన్నారు. అధునాతన వసతులు కల్పించి రెండు లక్షల పుస్తకాలతో గ్రంథాలయాన్ని నిర్వహిస్తున్నారు. విషయం తెలుసుకున్న ప్రధాని నరేంద్ర మోదీ మన్కీ బాత్ 84వ ఎపిసోడ్లో కూరెళ్లను అభినందించారని అన్నారు దుండ్ర కుమారస్వామి. ఆయన అనేక సాహితీ, విద్యాసంస్థల ఏర్పాటుకు కృషి చేశారు. ఆయన అనేక మంది విద్యార్థులకు కూడా సహకారం అందించారని తెలిపారు. ఆయన సహాయం చేసిన వారు ఇప్పుడు వివిధ హోదాల్లో ఉన్నారని దుండ్ర కుమారస్వామి తెలిపారు.
