గుర్గావ్లో సంచలనం సృష్టించిన రేయాన్ స్కూల్ బాలుడి హత్య కేసు ఊహించని మలుపు తిరిగింది. పరీక్షలు వాయిదా వేయించాలనే ఉద్దేశంతో పదకొండో తరగతి చదువుతున్న ఓ విద్యార్థి.. చిన్నారి ప్రద్యుమ్న్ ఠాకూర్ను హత్య చేసినట్లు సీబీఐ తేల్చింది. సెప్టెంబర్ 8న రేయాన్ ఇంటర్నేషనల్ స్కూల్లో రెండో తరగతి చదువుతున్న ఏడేళ్ల చిన్నారి ప్రద్యుమ్న్ అత్యంత దారుణంగా హత్యకు గురయ్యాడు. పాఠశాల బాత్రూమ్ వెలుపల రక్తపుమడుగులో పడిఉన్న ఆ చిన్నారి శవాన్ని మొదట స్కూల్ గార్డ్నర్ గుర్తించాడు. తండ్రి దిగబెట్టిన కాసేపటికే ఆ చిన్నారి దారుణ హత్యకు గురయ్యాడు.
బాలుడిపై లైంగిక దాడికి ప్రయత్నించి విఫలం చెందడంతో.. స్కూల్ బస్సు కండక్టర్ అశోక్ ఈ కిరాతకానికి పాల్పడ్డాడని మొదట అందరూ అనుమానించారు. పోలీసులు అతణ్ని అరెస్టు చేశారు. తల్లిదండ్రుల ఆందోళనలు తీవ్రమవడంతో.. ఆ ఘటనను సీరియస్గా తీసుకున్న ప్రభుత్వం సీబీఐ దర్యాప్తునకు ఆదేశించింది. లోతుగా దర్యాప్తు చేసిన సీబీఐ పోలీసులు తాజాగా షాకింగ్ నిజాలను బయటపెట్టారు.
పేరెంట్ – టీచర్ మీటింగ్ను, స్కూల్ పరీక్షలను రద్దు చేయించాలన్న ఉద్దేశంతోనే 11వ తరగతి విద్యార్థి.. చిన్నారి ప్రద్యుమ్న్ను హత్య చేసినట్లు సీబీఐ పోలీసులు తెలిపారు. సీసీటీవీ ఫుటేజీలు పరిశీలించిన తర్వాత కండక్టర్ అశోక్కు ఈ హత్యతో సంబంధం లేదని అంచనాకు వచ్చినట్లు వారు తెలిపారు. మరింత లోతుగా దర్యాప్తు చేయడంతో సీనియరే ప్రద్యుమ్న్ను హత్య చేసినట్లు తేలింది.
