RIMSలో నవజాత శిశువుల మృతి.. సమగ్ర విచారణ జరపాలి
తెలంగాణ రాష్ట్ర మానవ హక్కుల కమిషన్‌కు ఫిర్యాదు చేసిన జాతీయ బీసీ దళ్‌ అధ్యక్షుడు, న్యాయవాది దుండ్ర కుమారస్వామి
బాధిత కుటుంబాలకు తక్షణ ఆర్థిక సహాయం.. బాధ్యులైన అధికారులపై చర్యలు తీసుకోవాలి
ఆదిలాబాద్‌ RIMSలోని ప్రత్యేక నవజాత శిశు సంరక్షణ విభాగం (SNCU)లో సెప్టెంబర్‌ 21న చోటుచేసుకున్న అగ్ని, పొగ ఘటనలో ముగ్గురు నవజాత శిశువులు ప్రాణాలు కోల్పోవడం అత్యంత విషాదకరమని జాతీయ బీసీ దళ్‌ అధ్యక్షుడు, న్యాయవాది దుండ్ర కుమారస్వామి పేర్కొన్నారు. పలువురు శిశువులు అస్వస్థతకు గురై ఇతర ఆసుపత్రులకు తరలించాల్సి రావడం ఆందోళనకరమన్నారు. ప్రభుత్వ వైద్యశాలల్లో అత్యవసర భద్రతా ప్రమాణాలు, విద్యుత్‌ వ్యవస్థ, ఏసీ నిర్వహణ, అగ్నిమాపక సదుపాయాలు, అత్యవసర తరలింపు ఏర్పాట్లపై ఈ ఘటన తీవ్రమైన ప్రశ్నలను లేవనెత్తుతోందన్నారు. ఘటనపై మానవ హక్కుల కోణంలో నిష్పక్షపాత, సమగ్ర విచారణ జరిపి బాధ్యత ఎవరిదో నిర్ధారించాలని, బాధిత కుటుంబాలకు తక్షణ ఆర్థిక సహాయం, అవసరమైన వైద్య సహాయం, మానసిక అండతో పాటు మృతి చెందిన శిశువుల కుటుంబాలకు తగిన పరిహారం అందించాలని కోరుతూ తెలంగాణ రాష్ట్ర మానవ హక్కుల కమిషన్‌కు ఫిర్యాదు చేసినట్లు తెలిపారు.
ఇలాంటి ఘటనలు పునరావృతం కాకుండా భద్రతా ఆడిట్‌ చేపట్టాలి
రాష్ట్రంలోని ఇతర ప్రభుత్వ ఆసుపత్రుల్లో ఇలాంటి విషాద ఘటనలు పునరావృతం కాకుండా ప్రభుత్వం తక్షణ చర్యలు చేపట్టాలని దుండ్ర కుమారస్వామి డిమాండ్‌ చేశారు. అన్ని SNCUలు, ICUలు, ఇతర అత్యవసర విభాగాల్లో విద్యుత్‌ వ్యవస్థలు, ఏసీ పరికరాలు, ఫైర్‌ సేఫ్టీ, ఎమర్జెన్సీ ఎగ్జిట్లు, అలారాలు, బ్యాకప్‌ విద్యుత్‌, అత్యవసర తరలింపు ప్రణాళికలపై ప్రత్యేక భద్రతా ఆడిట్‌ నిర్వహించి లోపాలను వెంటనే సరిచేయాలని కోరారు. ఈ ఘటనలో ప్రాథమికంగా నిర్లక్ష్యం వహించినట్లు తేలిన అధికారులపై కఠిన చర్యలు తీసుకోవడంతో పాటు, విచారణను ప్రభావితం చేయకుండా సంబంధిత బాధ్యులైన అధికారులను, ముఖ్యంగా RIMS డైరెక్టర్‌/సూపరింటెండెంట్‌ను విచారణ పూర్తయ్యే వరకు వెంటనే సస్పెండ్‌ చేయాలని డిమాండ్‌ చేశారు. నవజాత శిశువుల ప్రాణాలకు సంబంధించిన ఈ ఘటనలో బాధ్యతను తేల్చి, బాధిత కుటుంబాలకు న్యాయం చేయడం ప్రభుత్వ తక్షణ బాధ్యత అని పేర్కొన్నారు.
