గుట్టల బేగంపేటలో అంగరంగ వైభవంగా సదర్ పండుగ వేడుకలు
సదర్ కేవలం సంబరం కాదు.. యాదవుల సంస్కృతి, సంప్రదాయాలకు ప్రతీక – మాజీ బీసీ కమిషన్ చైర్మన్ కృష్ణమోహన్, జాతీయ బీసీ దళ్ అధ్యక్షుడు దుండ్ర కుమారస్వామి(National President BC Dal Dundra Kumara Swamy)
శేరిలింగంపల్లి మండలం గుట్టల బేగంపేటలో చరణ్ యాదవ్, యాదగిరి యాదవ్, రాజు యాదవ్ ఆధ్వర్యంలో నిర్వహించిన సదర్ పండుగ వేడుకలు అంగరంగ వైభవంగా జరిగాయి. ఈ కార్యక్రమానికి మాజీ బీసీ కమిషన్ చైర్మన్ కృష్ణమోహన్, జాతీయ బీసీ దళ్ అధ్యక్షుడు దుండ్ర కుమారస్వామి ముఖ్య అతిథులుగా హాజరయ్యారు. యాదవుల సంస్కృతి, సంప్రదాయాలు, ఆచార వ్యవహారాలకు అద్దం పట్టేలా దున్నపోతులను అందంగా అలంకరించి, ప్రత్యేక పూజలు నిర్వహించి భక్తిశ్రద్ధలతో వేడుకలను జరుపుకున్నారు. ఈ సందర్భంగా వారు మాట్లాడుతూ.. సదర్ అంటే కేవలం సంబరం కాదు.. అది యాదవుల ఆత్మగౌరవానికి ప్రతీక. తరతరాలుగా వారసత్వంగా వస్తున్న సంస్కృతి, సంప్రదాయాల సమ్మేళనం. మన జీవన విధానంలో భాగమైన గొప్ప ఆచారం అని పేర్కొన్నారు. ఇలాంటి పండుగలు మన మూలాలను, పూర్వీకుల వారసత్వాన్ని భావితరాలకు పరిచయం చేస్తూ సామాజిక ఐక్యతను బలోపేతం చేస్తాయని అన్నారు.
ఈ వేడుకలు యువతలో నూతనోత్సాహాన్ని నింపుతూ ఆటపాటలు, ఉత్సాహభరితమైన నృత్యాలు, వివిధ సాంస్కృతిక కార్యక్రమాలతో ఆద్యంతం ఆకట్టుకున్నాయి. గుట్టల బేగంపేటకు చెందిన యువత పెద్ద సంఖ్యలో పాల్గొని వేడుకలను విజయవంతం చేశారు. సంప్రదాయాలను గౌరవిస్తూ, ఆధునిక తరానికి మన సంస్కృతిని పరిచయం చేయడంలో యువత చూపిన చొరవను ముఖ్య అతిథులు అభినందించారు. యాదవుల ఐక్యత, ఆత్మగౌరవం, సంస్కృతి, సంప్రదాయాల పరిరక్షణకు సదర్ పండుగ ఒక స్ఫూర్తిదాయక వేదికగా నిలుస్తుందని వారు పేర్కొన్నారు.
