రెండు ఎమ్మెల్సీ స్థానాల్లోనూ ఇండిపెండెంట్ బీసీలదే విజయం!
పార్టీలకు పట్టభద్రులు బుద్ధి చెప్పడం ఖాయం!
బీసీలకు దశాబ్దాలుగా అన్యాయం చేసిన పార్టీలకు పట్టభద్రుల తీర్పు చెంపపెట్టుగా మారబోతోందని జాతీయ బీసీ దళ్ అధ్యక్షుడు దుండ్ర కుమారస్వామి (Dundra Kumara Swamy)అన్నారు. రంగారెడ్డి జిల్లాలో “మన మాట – పట్టభద్రుల బాట”(Mana mata gradute Bata) పేరుతో ప్రత్యేకంగా నిర్వహించిన కార్యక్రమంలో భాగంగా పట్టభద్రులతో ముఖాముఖి ఆత్మీయ సమావేశం నిర్వహించారు. ఈ కార్యక్రమంలో పట్టభద్రుల ఆలోచనలు, ఆకాంక్షలు, అభిప్రాయాలను తెలుసుకుంటూ, వారి సమస్యలు, నిరుద్యోగం, విద్యావంతుల భవిష్యత్తు, సామాజిక న్యాయం వంటి అంశాలపై చర్చించారు. పట్టభద్రుల అభిప్రాయాలతో పాటు తమ ఆలోచనలను పంచుకుంటూ భవిష్యత్ కార్యాచరణపై సమాలోచన జరిపారు. ఈ సందర్భంగా జాతీయ బీసీ దళ్ అధ్యక్షుడు దుండ్ర కుమారస్వామి మాట్లాడుతూ, తెలంగాణలో త్వరలో జరగనున్న మహబూబ్నగర్–రంగారెడ్డి–హైదరాబాద్, వరంగల్–ఖమ్మం–నల్గొండ పట్టభద్రుల ఎమ్మెల్సీ ఎన్నికల్లో రెండు స్థానాలను స్వతంత్ర బీసీ అభ్యర్థులే కైవసం చేసుకుంటారని ధీమా వ్యక్తం చేశారు. పట్టభద్రుల ఎన్నికలను రాజకీయ పార్టీలు తమ ప్రతిష్ఠకు సంబంధించిన పోరుగా చిత్రీకరించడం మానుకోవాలని, ఇవి పార్టీలకు అతీతంగా పట్టభద్రుల ఆత్మగౌరవం, సామాజిక న్యాయం, నిరుద్యోగుల భవిష్యత్తుకు సంబంధించినవని పేర్కొన్నారు. రెండు స్థానాల్లోనూ గెలవాలని బీజేపీ నాయకత్వం పార్టీ శ్రేణులకు దిశానిర్దేశం చేయడాన్ని ప్రస్తావిస్తూ, బీసీలకు సామాజిక న్యాయం కల్పించడంలో విఫలమైన పార్టీలు ఇప్పుడు పట్టభద్రుల ఓట్ల కోసం మళ్లీ హామీల రాజకీయాలకు తెరలేపుతున్నాయని విమర్శించారు.
కేంద్రంలోని బీజేపీ ప్రభుత్వం బీసీలకు జనాభా నిష్పత్తి ప్రకారం న్యాయం చేయడంలో విఫలమైందని, రాష్ట్రంలోని కాంగ్రెస్ ప్రభుత్వం కూడా బీసీలకు ఇచ్చిన హామీలను పూర్తిస్థాయిలో అమలు చేయాలని డిమాండ్ చేశారు. గత బీఆర్ఎస్ పాలనలోనూ బీసీలకు ఆశించిన స్థాయిలో సామాజిక, రాజకీయ న్యాయం జరగలేదని విమర్శించారు. బీసీలకు న్యాయం చేయని పార్టీలకు పట్టభద్రులు ఎందుకు ఓటు వేయాలి? అని ప్రశ్నించారు. బీసీ జనగణన, విద్యా–ఉద్యోగ రంగాల్లో న్యాయమైన వాటా, రాజకీయ ప్రాతినిధ్యం, నిరుద్యోగులకు ఉపాధి అవకాశాలు, బీసీ రిజర్వేషన్ల అమలు వంటి అంశాలపై పార్టీలు స్పష్టమైన సమాధానం చెప్పాలని డిమాండ్ చేశారు. పట్టభద్రులు ప్రభుత్వాల పనితీరును ప్రశ్నించే చైతన్యవంతమైన వర్గమని, నిరుద్యోగ భృతి, జాబ్ క్యాలెండర్, యూత్ డిక్లరేషన్, ఉద్యోగుల పీఆర్సీ, డీఏ వంటి అంశాలను ఎన్నికల సమయంలో మాత్రమే ప్రస్తావించి, ఆ తర్వాత విస్మరించడం సరికాదని అన్నారు.
ఈ ఎన్నికల్లో పార్టీ గుర్తుల కంటే అభ్యర్థుల సామాజిక నిబద్ధత, బీసీల పట్ల చిత్తశుద్ధి, పట్టభద్రుల సమస్యలపై వారి పోరాటమే కీలకం కావాలని కుమారస్వామి పేర్కొన్నారు. రాజకీయ పార్టీలకు అతీతంగా స్వతంత్ర బీసీ అభ్యర్థులకు పట్టభద్రులు మద్దతు ఇవ్వాలని కోరారు. రాజకీయ పార్టీలు తమ గెలుపు కోసం సమావేశాలు నిర్వహించుకోవచ్చు, వ్యూహాలు రచించుకోవచ్చని, అయితే పట్టభద్రుల ఓటు అనేది పార్టీ నాయకుల ఆదేశాలకు కట్టుబడే నిర్ణయం కాదని, అది వారి ఆలోచన, ఆత్మగౌరవం, భవిష్యత్తుకు సంబంధించినదని అన్నారు. ఈ ఎన్నికలు పార్టీల ఆధిపత్యానికి కాదు.. పట్టభద్రుల ఆత్మగౌరవానికి! పదవుల కోసం కాదు.. బీసీల సామాజిక న్యాయం కోసం రెండు ఎమ్మెల్సీ స్థానాల్లోనూ స్వతంత్ర బీసీ అభ్యర్థుల విజయమే లక్ష్యంగా ప్రజాస్వామ్యబద్ధంగా పోరాటం సాగిస్తామని దుండ్ర కుమారస్వామి స్పష్టం చేశారు.




