తెలంగాణ: రాష్ట్రంలోని అన్ని ప్రాంతాల్లోని క్షవర వృత్తి శాలలకు (కటింగ్ షాపులకు), లాండ్రీ షాపులకు, దోభీఘాట్లకు నెలకు 250 యూనిట్ల వరకు నాణ్యమైన విద్యుత్తును ఉచితంగా ఇవ్వాలని సీఎం శ్రీ కె. చంద్రశేఖర్ రావు నిర్ణయించారు. రాష్ట్ర వ్యాప్తంగా రజక సంఘాలు, నాయీ బ్రాహ్మణ సంఘాలు ప్రభుత్వానికి ఇప్పటికే చేసిన విజ్జప్తులను పరిశీలించిన మీదట సీఎం ఈ నిర్ణయాన్ని తీసుకున్నారు. సీఎం ఆదేశాల మేరకు బీసీ సంక్షేమ శాఖ ప్రిన్సిపల్ సెక్రెటరీ శ్రీ బుర్ర వెంకటేశం విడుదల చేశారు.
ఈ ఉచిత విద్యుత్తు సరఫరా ఏప్రిల్1 తారీఖు నుంచే అమల్లోకి రానున్నది. ఈ సందర్భంగా బిసి దళ్ అధ్యక్షుడు దుండ్ర కుమారస్వామి మాట్లాడుతూ, బీసీల పట్ల సీఎం కేసీఆర్ చూపించిన సానుభూతికి హర్షం వ్యక్తం చేశారు. అత్యంత బలహీన వర్గాల అభ్యున్నతకు తెలంగాణ ప్రభుత్వం మరింత చేయుతని అందించాలని కోరారు. బిసిల సంక్షేమం కోసం మరిన్ని పథకాలను ప్రత్యేకంగా రూపొందించి వాటిని అమలు చేయాలని హితవు పలికారు. గ్రామ స్థాయి నుంచి జీహెచ్ఎంసీ దాకా వున్న కటింగు షాపులకు, లాండ్రీ షాపులకు, దోభీ ఘాట్ల కు 250 యూనిట్ల వరకు నాణ్యమైన కరెంటు ఉచితంగా అందుబాటులోకి రావడం వల్ల తర తరాలుగా కుల వృత్తిని ఆధారంగా చేసుకుని జీవనం కొనసాగిస్తున్న తెలంగాణలోని లక్షలాది రజక, నాయీ బ్రాహ్మణ కుటుంబాలకు లబ్ధి చేకూరనుందని ఆశాభావం వ్యక్తం చేశారు.
