నిరుద్యోగుల, పట్టభద్రుల ఆత్మీయ సమ్మేళనం

నిరుద్యోగుల, పట్టభద్రుల ఆత్మీయ సమ్మేళనం

పట్టభద్రులను ఉద్యోగులుగా మార్చడమే ప్రధాన ఎజెండా – జాబ్ మేళా

పట్టభద్రుల సమస్యలపై చర్చించి, వారితో ముఖాముఖి మాట్లాడిన జాతీయ బీసీ దళ్ అధ్యక్షుడు, బీసీ రిజర్వేషన్ల సాధన సమన్వయ జేఏసీ చైర్మన్ దుండ్ర కుమారస్వామి(National President BC Dal Dundra Kumara Swamy)

పట్టభద్రుల సమస్యలను పరిష్కరించడమే ప్రధాన అజెండాగా యుద్ధప్రాతిపదికన ముందుకు సాగుతామని, నిరుద్యోగ యువత కష్టాలను తొలగించి, వారి జీవితాల్లో భరోసా నింపేందుకు ఎంత దూరమైనా వెళతానని జాతీయ బీసీ దళ్ అధ్యక్షుడు దుండ్ర కుమారస్వామి అన్నారు. తెలంగాణలో డిగ్రీలు, పీజీలు పూర్తి చేసిన లక్షలాది మంది యువతకు అర్హతకు తగిన ప్రభుత్వ, ప్రైవేటు ఉద్యోగాలు కల్పించడంలో నెలకొన్న అంతరాన్ని తొలగించాలని, నిరుద్యోగ సమస్యకు శాశ్వత పరిష్కారం చూపాలని ఆయన డిమాండ్ చేశారు.

మన్నన్, బ్లిస్‌బర్గ్ ఫ్యూచర్ ఆఫ్ హోప్ ఆధ్వర్యంలో మెహిదీపట్నం గుడిమల్కాపూర్‌లోని కింగ్స్ ప్యాలెస్‌లో నిర్వహించిన పట్టభద్రుల ఆత్మీయ సమ్మేళనం, జాబ్ మేళా–2026లో జాతీయ బీసీ దళ్ అధ్యక్షుడు, బీసీ రిజర్వేషన్ల సాధన సమన్వయ జేఏసీ చైర్మన్, హైకోర్టు న్యాయవాది దుండ్ర కుమారస్వామి, డాక్టర్ వినయ్ సరికొండ తదితరులు పాల్గొన్నారు.

ఈ సందర్భంగా దుండ్ర కుమారస్వామి మాట్లాడుతూ, నిరుద్యోగ యువతకు ఉపాధి అవకాశాలు, ఫ్రెషర్స్‌కు ఉద్యోగ ప్రవేశ మార్గాలు, విద్యార్హతలకు తగిన వేతనాలు, ప్రభుత్వ నియామకాల్లో పారదర్శకత, ప్రైవేటు రంగంలో స్థానిక యువతకు అవకాశాలు కల్పించడం అత్యంత ప్రాధాన్యత కలిగిన అంశాలని పేర్కొన్నారు. విద్యావంతులైన యువత ఉపాధి కోసం ఇతర రాష్ట్రాలకు వలస వెళ్లాల్సిన పరిస్థితి మారాలని, ఉద్యోగ కల్పన జాతీయ అభివృద్ధి, ఆర్థిక సాధికారత, సామాజిక న్యాయానికి కీలకమని స్పష్టం చేశారు. పట్టభద్రుల ఎమ్మెల్సీ ఎన్నికల్లో రాజకీయ పార్టీలకతీతంగా పట్టభద్రులు, నిరుద్యోగులు, ఉద్యోగులు, ఉపాధ్యాయుల సమస్యలపై నిరంతరం పోరాడే నిబద్ధత కలిగిన నాయకత్వాన్ని ఎన్నుకోవాలని పిలుపునిచ్చారు.

ఈ సందర్భంగా సభలో పాల్గొన్న పట్టభద్రులు, యువత పెద్ద ఎత్తున స్పందిస్తూ హైదరాబాద్–రంగారెడ్డి–మహబూబ్‌నగర్ పట్టభద్రుల ఎమ్మెల్సీ నియోజకవర్గం నుంచి దుండ్ర కుమారస్వామి స్వతంత్ర అభ్యర్థిగా పోటీ చేయాలని డిమాండ్ చేశారు. రాజకీయ పార్టీలకు అతీతంగా విద్యావంతుల గొంతుకగా, నిరుద్యోగ యువత ఆశయాలకు ప్రతినిధిగా శాసనమండలిలో నిలవాలని విజ్ఞప్తి చేశారు. నిరుద్యోగుల సమస్యలపై నిరంతర పోరాటం, ఉద్యోగ అవకాశాల కల్పన, యువతకు నైపుణ్యాభివృద్ధి, పట్టభద్రుల హక్కుల పరిరక్షణకు ప్రాధాన్యత ఇవ్వాలని సమావేశం ఆకాంక్షించింది. విద్యావంతుల ఆశయాలకు కార్యరూపం ఇచ్చే నాయకత్వం అవసరమని పలువురు అభిప్రాయపడ్డారు.

యువత ఆకాంక్షలపై సానుకూలంగా స్పందించిన కుమారస్వామి, “పట్టభద్రులు, నిరుద్యోగులు, ఉద్యోగులు, ఉపాధ్యాయులు నాపై ఉంచిన విశ్వాసాన్ని గౌరవిస్తూ, వారి హక్కులు, ఉపాధి అవకాశాలు, సామాజిక న్యాయం కోసం నిరంతరం పోరాడేందుకు సిద్ధంగా ఉన్నాను. మీ సమస్యలను శాసనమండలిలో బలంగా వినిపించి పరిష్కారం కోసం కృషి చేస్తాను” అని హామీ ఇచ్చారు. విద్య, ఉపాధి, సమాన అవకాశాలు, యువత సాధికారత, సామాజిక న్యాయం కేవలం ప్రాంతీయ సమస్యలు కాకుండా దేశ అభివృద్ధిని ప్రభావితం చేసే జాతీయ ప్రాధాన్యత కలిగిన అంశాలని పేర్కొన్నారు. పట్టభద్రుల ప్రతినిధిత్వం పదవికి పరిమితం కాకుండా ప్రజా సమస్యల పరిష్కారానికి, నిరుద్యోగ నిర్మూలనకు, యువత భవిష్యత్తుకు వేదిక కావాలన్నదే తమ లక్ష్యమని స్పష్టం చేశారు.