ఉచిత ప్రమాద బీమా స్వాతంత్య్ర దినోత్సవం రోజున ప్రారంభించనున్నారు
ప్రతి పౌరుడికి సామాజిక భద్రత లక్ష్యంగా.. పంద్రాగస్టు నుంచి 50 కోట్ల మందిని (10కోట్ల కుటుంబాలు) ఉచిత ప్రమాద బీమా పరిధిలోకి తీసుకువచ్చే దిశలో కేంద్రం వేగాన్ని పెంచింది. కేంద్ర ప్రభుత్వం ఈ ఏడాది బడ్జెట్లో దీన్ని ప్రముఖంగా ప్రస్తావించగా.. ప్రధాన మంత్రి నరేంద్ర మోదీ ఈ పథకాన్ని స్వాతంత్య్ర దినోత్సవం రోజున ప్రారంభించనున్నారు. అయితే.. ఇప్పటి వరకు ఈ బీమాకు సంబంధించిన విధివిధానాలను కేంద్ర వెల్లడించకపోయినా.. జన్ధన్ ఖాతాలతో ఈ పథకానికి లంకె ఉంటుందని ఆర్థిక శాఖ అధికారులు సూత్రప్రాయంగా చెబుతున్నారు. ‘దేశంలో ప్రస్తుతం 32 కోట్ల మందికి జన్ధన్ ఖాతాలున్నాయి.
వీరిలో రూపే కార్డు వాడుతున్న 24 కోట్ల మంది ఇప్పటికే రూ. లక్ష బీమా పరిధిలో ఉన్నారు. ప్రధాన మంత్రి సురక్ష బీమా యోజన కూడా ఇప్పటకే అమల్లో ఉంది. ఏడాదికి రూ. 12 చెల్లించడం ద్వారా.. రూ. 2లక్షల కవరేజీతో బీమా పాలసీని తీసుకోవచ్చు. ఇదే తరహాలో.. ప్రభుత్వమే ఆ రూ. 12 చెల్లించి.. జన్ధన్ యోజన ఖాతాదారులందరికీ ఉచిత ప్రమాద బీమాను అందించనుంది. అయితే.. జన్ధన్ ఖాతాదారులు మూడు నెలల్లో కనీసం ఒక్కసారైనా రూపే కార్డును వినియోగించి ఉండాలి’ అని వివరించారు.
