సమాచారం వెంటనే అందించేలా ప్రభుత్వ శాఖలను ఆదేశించండి
సీఎం రేవంత్ రెడ్డి ని కలిసి కోరిన బీసీ కమిషన్ చైర్మన్ డాక్టర్ వకుళాభరణం కృష్ణ మోహన్ రావు
తెలంగాణ బీసీ కమిషన్ వివిధ అధ్యయనాలలో భాగంగా కోరే సమాచారాన్ని, వివరాలను వెంటనే అందించి, సహకరించేలా ఆయా ప్రభుత్వ విభాగాలకు, జిల్లా కలెక్టర్లకు ఆదేశాలు జారీ చేయాలని తెలంగాణ బీసీ కమిషన్ చైర్మన్ డాక్టర్ వకుళాభరణం కృష్ణమోహన్ రావు ముఖ్యమంత్రి శ్రీ రేవంత్ రెడ్డిని కలిసి విజ్ఞప్తి చేశారు.
శుక్రవారం నాడు రాత్రి అసెంబ్లీ లో ముఖ్యమంత్రిని కలిసి ఈ మేరకు విజ్ఞప్తి చేసినట్లు, పలు పత్రాలు అందజేసినట్లు డాక్టర్ వకుళాభరణం తెలిపారు.
స్థానిక సంస్థల ఎన్నికలలో బీసీ రిజర్వేషన్ల ను నిర్ణయించడానికి గాను ,అలాగే ప్రభుత్వం ఇచ్చిన టర్మ్స్ ఆఫ్ రెఫరెన్స్ మేరకు ఆయా ప్రభుత్వ విభాగాలను సమాచారం ఇవ్వాలని బీసీ కమిషన్ ఎప్పటికప్పుడు లేఖలను రాయడం జరుగుతుంది. త్వరగా కమిషన్ కు వివరాలు అందినట్లైతే నివేదికలను సకాలంలో అందజేయడానికి వీలుంటుంది.
ఇదిలా ఉండగా ప్రస్తుతం లోకల్ బాడీ ఎన్నికలను వీలైనంత త్వరగా నిర్వహించాలని ప్రభుత్వం భావిస్తున్నది. ఈ నేపథ్యంలో ఇటీవల ముఖ్యమంత్రి అధ్యక్షతన సచివాలయంలో స్థానిక సంస్థల ఎన్నికల నిర్వహణ అంశంపై అధికారులు, బీసీ కమిషన్ ఛైర్మన్ తో రెండు సార్లు సమావేశం నిర్వహించారు. త్వరగా కార్యచరణ ప్రణాళికలను ప్రభుత్వం కు అందచేయాలని కోరారు.
ఈ దిశగా శుక్రవారం నాడు డాక్టర్ వకుళాభరణం కమిషన్ చేస్తున్న అధ్యయనం, తదితర అంశాలను ముఖ్యమంత్రిని కలిసి లిఖిత పూర్వకంగా పత్రాలను అందజేసినట్లు తెలిపారు.
