దేశంలో కరోనా విలాయతాండవం చేస్తోంది. దీంతో టీకా ప్రచారం వేగవంతం అవుతోంది. అయితే ప్రజలకు టీకా గురించి చాలా సందేహాలు ఉన్నాయి. అందులో ఒక సాధారణ ప్రశ్న ఏంటంటే టీకా వేసుకున్నాక మద్యానికి దూరంగా ఉండాలా అనేది ఇప్పుడు అందరిలో నెలకొన్న ప్రశ్న. టీకా, మద్యానికి సంబంధించిన ప్రశ్నలకు కేంద్ర ఆరోగ్య, కుటుంబ సంక్షేమ మంత్రిత్వ శాఖ ఈ విధంగా స్పందించింది.
కరోనా వ్యాక్సిన్ ప్రభావాన్ని ఆల్కహాల్ తగ్గిస్తుందని ఇప్పటివరకు ఎటువంటి ఆధారాలు లేవు. మెడిసిన్ అండ్ హెల్త్‌కేర్ ప్రొడక్ట్స్ రెగ్యులేటరీ ఏజెన్సీ (ఎంహెచ్‌ఆర్‌ఎ) ప్రకారం.. ఆల్కహాల్ వ్యాక్సిన్ సామర్థ్యాన్ని తగ్గిస్తుందని ఎటువంటి ఆధారాలు లేవు. దీని గురించి ఆందోళన చెందుతున్న వారు వైద్యుడిని సంప్రదించాలని తెలిపారు. అయితే నిపుణుల అభిప్రాయం ప్రకారం.. మద్యం అధికంగా సేవించడం వల్ల శరీరంలో ప్రతికూల ప్రభావాలు మొదలవుతాయి. రోగనిరోధక శక్తి తగ్గిపోతుంది.
ఒక వ్యక్తి పరిమితంగా మద్యం తాగితే శరీరంలో వ్యాక్సిన్ ప్రభావాలను తగ్గించే ప్రమాదం లేదు. ఏది ఏమైనప్పటికీ మద్యం సేవించకపోతే మీ ఆరోగ్యానికి మంచిదని రుజువు చేస్తుంది. మద్యం, ధూమపానం మీ ఆరోగ్యానికి అనేక విధాలుగా హాని కలిగిస్తాయి. కరోనా సమయంలో అవి మానుకుంటే శరీరానికి చాలా వరకు మంచి జరుగుతుంది అని వైద్యులు సూచిస్తున్నారు..
